The Paris Psalter: Psalm 120

Verse Indeterminate Saxon

Hof ic mine eagan to þam hean beorge,
þær ic fultum fand fælne æt þearfe.
Is min fultum eac fæger æt drihtne,
se ðe heofon worhte, hrusan swylce.

5

Ne sylle he þinne fot on feondes geweald,
ne hycge to slæpe se ðe healdeð þe.
Efne se on hygde huru ne slæpeð
ne swefeð swyðe, se þe sceal healdan nu
Israela folc utan wið feondum.

10

Gehealde þe halig drihten,
and þin mundbora mihtig weorðe
ofer þa swiðran hand symble æt þearfe.
Ne þe sunne on dæge sol ne gebærne
ne þe mona on niht min ne geweorðe,

15

ac þe gehealde halig drihten
wyð yfela gehwam æghwær georne
and ðine sawle swylce gehealde.
Utgang þinne and ingang ece drihten,
sawla soðcynincg, symble gehealde

20

of þisson forð awa to worulde.