Psalms (Tehilim): Psalms (Tehilim) Chapter 143

Tanach (Hebrew): Psalms (Tehilim) Chapter 143

‎1 ‏מִזְמ֗וֹר לְדָ֫וִ֥ד יְהוָ֤ה׀ שְׁמַ֬ע תְּפִלָּתִ֗י הַאֲזִ֥ינָה אֶל־תַּחֲנוּנַ֑י בֶּאֱמֻנָתְךָ֥ עֲ֝נֵ֗נִי בְּצִדְקָתֶֽךָ׃ ‎2 ‏וְאַל־תָּב֣וֹא בְ֭מִשְׁפָּט אֶת־עַבְדֶּ֑ךָ כִּ֤י לֹֽא־יִצְדַּ֖ק לְפָנֶ֣יךָ כָל־חָֽי׃ ‎3 ‏כִּ֥י רָ֘דַ֤ף אוֹיֵ֨ב׀ נַפְשִׁ֗י דִּכָּ֣א לָ֭אָרֶץ חַיָּתִ֑י הוֹשִׁיבַ֥נִי בְ֝מַחֲשַׁכִּ֗ים כְּמֵתֵ֥י עוֹלָֽם׃ ‎4 ‏וַתִּתְעַטֵּ֣ף עָלַ֣י רוּחִ֑י בְּ֝תוֹכִ֗י יִשְׁתּוֹמֵ֥ם לִבִּֽי׃ ‎5 ‏זָ֘כַ֤רְתִּי יָמִ֨ים׀ מִקֶּ֗דֶם הָגִ֥יתִי בְכָל־פָּעֳלֶ֑ךָ בְּֽמַעֲשֵׂ֖ה יָדֶ֣יךָ אֲשׂוֹחֵֽחַ׃ ‎6 ‏פֵּרַ֣שְׂתִּי יָדַ֣י אֵלֶ֑יךָ נַפְשִׁ֓י׀ כְּאֶֽרֶץ־עֲיֵפָ֖ה לְךָ֣ סֶֽלָה׃ ‎7 ‏מַ֘הֵ֤ר עֲנֵ֨נִי׀ יְהוָה֮ כָּלְתָ֪ה ר֫וּחִ֥י אַל־תַּסְתֵּ֣ר פָּנֶ֣יךָ מִמֶּ֑נִּי וְ֝נִמְשַׁ֗לְתִּי עִם־יֹ֥רְדֵי בֽוֹר׃ ‎8 ‏הַשְׁמִ֘יעֵ֤נִי בַבֹּ֨קֶר׀ חַסְדֶּךָ֮ כִּֽי־בְךָ֪ בָ֫טָ֥חְתִּי הוֹדִיעֵ֗נִי דֶּֽרֶךְ־ז֥וּ אֵלֵ֑ךְ כִּֽי־אֵ֝לֶיךָ נָשָׂ֥אתִי נַפְשִֽׁי׃ ‎9 ‏הַצִּילֵ֖נִי מֵאֹיְבַ֥י׀ יְהוָ֗ה אֵלֶ֥יךָ כִסִּֽתִי׃ ‎10 ‏לַמְּדֵ֤נִי׀ לַֽעֲשׂ֣וֹת רְצוֹנֶךָ֮ כִּֽי־אַתָּ֪ה אֱל֫וֹהָ֥י רוּחֲךָ֥ טוֹבָ֑ה תַּ֝נְחֵ֗נִי בְּאֶ֣רֶץ מִישֽׁוֹר׃ ‎11 ‏לְמַֽעַן־שִׁמְךָ֣ יְהוָ֣ה תְּחַיֵּ֑נִי בְּצִדְקָתְךָ֓׀ תוֹצִ֖יא מִצָּרָ֣ה נַפְשִֽׁי׃ ‎12 ‏וּֽבְחַסְדְּךָ֮ תַּצְמִ֪ית אֹ֫יְבָ֥י וְֽ֭הַאֲבַדְתָּ כָּל־צֹרֲרֵ֣י נַפְשִׁ֑י כִּ֝֗י אֲנִ֣י עַבְדֶּֽךָ׃

1 mizəmwōr ləḏāwiḏ yəhwâ| šəma‘ təfillāṯî ha’ăzînâ ’el-taḥănûnay be’ĕmunāṯəḵā ‘ănēnî bəṣiḏəqāṯeḵā: 2 wə’al-tāḇwō’ ḇəmišəpāṭ ’eṯ-‘aḇədeḵā kî lō’-yiṣədaq ləfāneyḵā ḵāl-ḥāy: 3 kî rāḏaf ’wōyēḇ| nafəšî dikā’ lā’āreṣ ḥayyāṯî hwōšîḇanî ḇəmaḥăšakîm kəmēṯê ‘wōlām: 4 watiṯə‘aṭṭēf ‘ālay rûḥî bəṯwōḵî yišətwōmēm libî: 5 zāḵarətî yāmîm| miqqeḏem hāḡîṯî ḇəḵāl-pā‘ŏleḵā bəma‘ăśēh yāḏeyḵā ’ăśwōḥēḥa: 6 pēraśətî yāḏay ’ēleyḵā nafəšî| kə’ereṣ-‘ăyēfâ ləḵā selâ: 7 mahēr ‘ănēnî| yəhwâ kāləṯâ rûḥî ’al-tasətēr pāneyḵā mimmennî wəniməšalətî ‘im-yōrəḏê ḇwōr: 8 hašəmî‘ēnî ḇabōqer| ḥasədeḵā kî-ḇəḵā ḇāṭāḥətî hwōḏî‘ēnî dereḵə-zû ’ēlēḵə kî-’ēleyḵā nāśā’ṯî nafəšî: 9 haṣṣîlēnî mē’ōyəḇay| yəhwâ ’ēleyḵā ḵissiṯî: 10 lamməḏēnî| la‘ăśwōṯ rəṣwōneḵā kî-’atâ ’ĕlwōhāy rûḥăḵā ṭwōḇâ tanəḥēnî bə’ereṣ mîšwōr: 11 ləma‘an-šiməḵā yəhwâ təḥayyēnî bəṣiḏəqāṯəḵā| ṯwōṣî’ miṣṣārâ nafəšî: 12 ûḇəḥasədəḵā taṣəmîṯ ’ōyəḇāy wəha’ăḇaḏətā kāl-ṣōrărê nafəšî kî ’ănî ‘aḇədeḵā: