Psalms (Tehilim): Psalms (Tehilim) Chapter 36

Tanach (Hebrew): Psalms (Tehilim) Chapter 36

‎1 ‏לַמְנַצֵּ֬חַ׀ לְעֶֽבֶד־יְהוָ֬ה לְדָוִֽד׃ ‎2 ‏נְאֻֽם־פֶּ֣שַׁע לָ֭רָשָׁע בְּקֶ֣רֶב לִבִּ֑י אֵֽין־פַּ֥חַד אֱ֝לֹהִ֗ים לְנֶ֣גֶד עֵינָֽיו׃ ‎3 ‏כִּֽי־הֶחֱלִ֣יק אֵלָ֣יו בְּעֵינָ֑יו לִמְצֹ֖א עֲוֹנ֣וֹ לִשְׂנֹֽא׃ ‎4 ‏דִּבְרֵי־פִ֭יו אָ֣וֶן וּמִרְמָ֑ה חָדַ֖ל לְהַשְׂכִּ֣יל לְהֵיטִֽיב׃ ‎5 ‏אָ֤וֶן׀ יַחְשֹׁ֗ב עַֽל־מִשְׁכָּ֫ב֥וֹ יִ֭תְיַצֵּב עַל־דֶּ֣רֶךְ לֹא־ט֑וֹב רָ֝֗ע לֹ֣א יִמְאָֽס׃ ‎6 ‏יְ֭הוָה בְּהַשָּׁמַ֣יִם חַסְדֶּ֑ךָ אֱ֝מֽוּנָתְךָ֗ עַד־שְׁחָקִֽים׃ ‎7 ‏צִדְקָֽתְךָ֨׀³ כְּֽהַרְרֵי־אֵ֗ל מִ֭שְׁפָּטֶךָ תְּה֣וֹם רַבָּ֑ה אָ֤דָֽם־וּבְהֵמָ֖ה תוֹשִׁ֣יעַ יְהוָֽה׃ ‎8 ‏מַה־יָּקָ֥ר חַסְדְּךָ֗ אֱלֹ֫הִ֥ים וּבְנֵ֥י אָדָ֑ם בְּצֵ֥ל כְּ֝נָפֶ֗יךָ יֶחֱסָיֽוּן׃ ‎9 ‏יִ֭רְוְיֻן מִדֶּ֣שֶׁן בֵּיתֶ֑ךָ וְנַ֖חַל עֲדָנֶ֣יךָ תַשְׁקֵֽם׃ ‎10 ‏כִּֽי־עִ֭מְּךָ מְק֣וֹר חַיִּ֑ים בְּ֝אוֹרְךָ֗ נִרְאֶה־אֽוֹר׃ ‎11 ‏מְשֹׁ֣ךְ חַ֭סְדְּךָ לְיֹדְעֶ֑יךָ וְ֝צִדְקָֽתְךָ֗ לְיִשְׁרֵי־לֵֽב׃ ‎12 ‏אַל־תְּ֭בוֹאֵנִי רֶ֣גֶל גַּאֲוָ֑ה וְיַד־רְ֝שָׁעִ֗ים אַל־תְּנִדֵֽנִי׃ ‎13 ‏שָׁ֣ם נָ֭פְלוּ פֹּ֣עֲלֵי אָ֑וֶן דֹּ֝ח֗וּ וְלֹא־יָ֥כְלוּ קֽוּם׃

1 lamənaṣṣēḥa| lə‘eḇeḏ-yəhwâ ləḏāwiḏ:

2 nə’um-peš^a‘ lārāšā‘ bəqereḇ libî ’ên-p^aḥaḏ ’ĕlōhîm ləneḡeḏ ‘ênāyw:

3 kî-heḥĕlîq ’ēlāyw bə‘ênāyw liməṣō’ ‘ăwōnwō liśənō’:

4 diḇərê-fîw ’āwen ûmirəmâ ḥāḏal ləhaśəkîl ləhêṭîḇ:

5 ’āwen| y^aḥəšōḇ ‘al-mišəkāḇwō yiṯəyaṣṣēḇ ‘al-dereḵə lō’-ṭwōḇ rā‘ lō’ yimə’ās:

6 yəhwâ bəhaššāmayim ḥasədeḵā ’ĕmûnāṯəḵā ‘aḏ-šəḥāqîm:

7 ṣiḏəqāṯəḵā|³ kəharərê-’ēl mišəpāṭeḵā təhwōm rabâ ’āḏām-ûḇəhēmâ ṯwōšî‘a yəhwâ:

8 mah-yyāqār ḥasədəḵā ’ĕlōhîm ûḇənê ’āḏām bəṣēl kənāfeyḵā yeḥĕsāyûn:

9 yirəwəyun midešen bêṯeḵā wən^aḥal ‘ăḏāneyḵā ṯašəqēm:

10 kî-‘imməḵā məqwōr ḥayyîm bə’wōrəḵā nirə’eh-’wōr:

11 məšōḵə ḥasədəḵā ləyōḏə‘eyḵā wəṣiḏəqāṯəḵā ləyišərê-lēḇ:

12 ’al-təḇwō’ēnî reḡel ga’ăwâ wəyaḏ-rəšā‘îm ’al-təniḏēnî:

13 šām nāfəlû pō‘ălê ’āwen dōḥû wəlō’-yāḵəlû qûm: