Psalms (Tehilim): Psalms (Tehilim) Chapter 45

Tanach (Hebrew): Psalms (Tehilim) Chapter 45

‎1 ‏לַמְנַצֵּ֣חַ עַל־שֹׁ֭שַׁנִּים לִבְנֵי־קֹ֑רַח מַ֝שְׂכִּ֗יל שִׁ֣יר יְדִידֹֽת׃ ‎2 ‏רָ֘חַ֤שׁ לִבִּ֨י׀ דָּ֘בָ֤ר ט֗וֹב אֹמֵ֣ר אָ֭נִי מַעֲשַׂ֣י לְמֶ֑לֶךְ לְ֝שׁוֹנִ֗י עֵ֤ט׀ סוֹפֵ֬ר מָהִֽיר׃ ‎3 ‏יָפְיָפִ֡יתָ מִבְּנֵ֬י אָדָ֗ם ה֣וּצַק חֵ֭ן בְּשְׂפְתוֹתֶ֑יךָ עַל־כֵּ֤ן בֵּֽרַכְךָ֖ אֱלֹהִ֣ים לְעוֹלָֽם׃ ‎4 ‏חֲגֽוֹר־חַרְבְּךָ֣ עַל־יָרֵ֣ךְ גִּבּ֑וֹר ה֝וֹדְךָ֗ וַהֲדָרֶֽךָ׃ ‎5 ‏וַהֲדָ֬רְךָ֨׀³ צְלַ֬ח רְכַ֗ב עַֽל־דְּבַר־אֱ֭מֶת וְעַנְוָה־צֶ֑דֶק וְתוֹרְךָ֖ נוֹרָא֣וֹת יְמִינֶֽךָ׃ ‎6 ‏חִצֶּ֗יךָ שְׁנ֫וּנִ֥ים עַ֭מִּים תַּחְתֶּ֣יךָ יִפְּל֑וּ בְּ֝לֵ֗ב אוֹיְבֵ֥י הַמֶּֽלֶךְ׃ ‎7 ‏כִּסְאֲךָ֣ אֱ֭לֹהִים עוֹלָ֣ם וָעֶ֑ד שֵׁ֥בֶט מִ֝ישֹׁ֗ר שֵׁ֣בֶט מַלְכוּתֶֽךָ׃ ‎8 ‏אָהַ֣בְתָּ צֶּדֶק֮ וַתִּשְׂנָ֫א רֶ֥שַׁע עַל־כֵּ֤ן׀ מְשָׁחֲךָ֡ אֱלֹהִ֣ים אֱ֭לֹהֶיךָ שֶׁ֥מֶן שָׂשׂ֗וֹן מֵֽחֲבֵרֶֽיךָ׃ ‎9 ‏מֹר־וַאֲהָל֣וֹת קְ֭צִיעוֹת כָּל־בִּגְדֹתֶ֑יךָ מִֽן־הֵ֥יכְלֵי שֵׁ֝֗ן מִנִּ֥י שִׂמְּחֽוּךָ׃ ‎10 ‏בְּנ֣וֹת מְ֭לָכִים בְּיִקְּרוֹתֶ֑יךָ נִצְּבָ֥ה שֵׁגַ֥ל לִֽ֝ימִינְךָ֗ בְּכֶ֣תֶם אוֹפִֽיר׃ ‎11 ‏שִׁמְעִי־בַ֣ת וּ֭רְאִי וְהַטִּ֣י אָזְנֵ֑ךְ וְשִׁכְחִ֥י עַ֝מֵּ֗ךְ וּבֵ֥ית אָבִֽיךְ׃ ‎12 ‏וְיִתְאָ֣ו הַמֶּ֣לֶךְ יָפְיֵ֑ךְ כִּי־ה֥וּא אֲ֝דֹנַ֗יִךְ וְהִשְׁתַּֽחֲוִי־לֽוֹ׃ ‎13 ‏וּבַֽת־צֹ֨ר׀ בְּ֭מִנְחָה פָּנַ֥יִךְ יְחַלּ֗וּ עֲשִׁ֣ירֵי עָֽם׃ ‎14 ‏כָּל־כְּבוּדָּ֣ה בַת־מֶ֣לֶךְ פְּנִ֑ימָה מִֽמִּשְׁבְּצ֖וֹת זָהָ֣ב לְבוּשָֽׁהּ׃ ‎15 ‏לִרְקָמוֹת֮ תּוּבַ֪ל לַ֫מֶּ֥לֶךְ בְּתוּל֣וֹת אַ֭חֲרֶיהָ רֵעוֹתֶ֑יהָ מ֖וּבָא֣וֹת לָֽךְ׃ ‎16 ‏תּ֖וּבַלְנָה בִּשְׂמָחֹ֣ת וָגִ֑יל תְּ֝בֹאֶ֗ינָה בְּהֵ֣יכַל מֶֽלֶךְ׃ ‎17 ‏תַּ֣חַת אֲ֭בֹתֶיךָ יִהְי֣וּ בָנֶ֑יךָ תְּשִׁיתֵ֥מוֹ לְ֝שָׂרִ֗ים בְּכָל־הָאָֽרֶץ׃ ‎18 ‏אַזְכִּ֣ירָה שִׁ֭מְךָ בְּכָל־דֹּ֣ר וָדֹ֑ר עַל־כֵּ֥ן עַמִּ֥ים יְ֝הוֹדֻ֗ךָ לְעֹלָ֥ם וָעֶֽד׃

1 lamənaṣṣēḥa ‘al-šōšannîm liḇənê-qōr^aḥ maśəkîl šîr yəḏîḏōṯ:

2 rāḥaš libî| dāḇār ṭwōḇ ’ōmēr ’ānî m^a‘ăśay ləmeleḵə ləšwōnî ‘ēṭ| swōfēr mâîr:

3 yāfəyāfîṯā mibənê ’āḏām hûṣaq ḥēn bəśəfəṯwōṯeyḵā ‘al-kēn bēraḵəḵā ’ĕlōhîm lə‘wōlām:

4 ḥăḡwōr-ḥarəbəḵā ‘al-yārēḵə gibwōr hwōḏəḵā wahăḏāreḵā:

5 wahăḏārəḵā|³ ṣəl^aḥ rəḵaḇ ‘al-dəḇar-’ĕmeṯ wə‘anəwâ-ṣeḏeq wəṯwōrəḵā nwōrā’wōṯ yəmîneḵā:

6 ḥiṣṣeyḵā šənûnîm ‘ammîm t^aḥəteyḵā yipəlû bəlēḇ ’wōyəḇê hammeleḵə:

7 kisə’ăḵā ’ĕlōhîm ‘wōlām wā‘eḏ šēḇeṭ mîšōr šēḇeṭ maləḵûṯeḵā:

8 ’âaḇətā ṣṣeḏeq watiśənā’ reš^a‘ ‘al-kēn| məšāḥăḵā ’ĕlōhîm ’ĕlōheyḵā šemen śāśwōn mēḥăḇēreyḵā:

9 mōr-wa’ăhālwōṯ qəṣî‘wōṯ kāl-biḡəḏōṯeyḵā min-hêḵəlê šēn minnî śimməḥûḵā:

10 bənwōṯ məlāḵîm bəyiqqərwōṯeyḵā niṣṣəḇâ šēḡal lîmînəḵā bəḵeṯem ’wōfîr:

11 šimə‘î-ḇaṯ ûrə’î wəhaṭṭî ’āzənēḵə wəšiḵəḥî ‘ammēḵə ûḇêṯ ’āḇîḵə:

12 wəyiṯə’āw hammeleḵə yāfəyēḵə kî-hû’ ’ăḏōnayiḵə wəhišət^aḥăwî-lwō:

13 ûḇaṯ-ṣōr| bəminəḥâ pānayiḵə yəḥallû ‘ăšîrê ‘ām:

14 kāl-kəḇûdâ ḇaṯ-meleḵə pənîmâ mimmišəbəṣwōṯ zâāḇ ləḇûšāh:

15 lirəqāmwōṯ tûḇal lammeleḵə bəṯûlwōṯ ’^aḥăreyhā rē‘wōṯeyhā mûḇā’wōṯ lāḵə:

16 tûḇalənâ biśəmāḥōṯ wāḡîl təḇō’eynâ bəhêḵal meleḵə:

17 t^aḥaṯ ’ăḇōṯeyḵā yihəyû ḇāneyḵā təšîṯēmwō ləśārîm bəḵāl-hā’āreṣ:

18 ’azəkîrâ šiməḵā bəḵāl-dōr wāḏōr ‘al-kēn ‘ammîm yəhwōḏuḵā lə‘ōlām wā‘eḏ: