Psalms (Tehilim): Psalms (Tehilim) Chapter 95

Tanach (Hebrew): Psalms (Tehilim) Chapter 95

‎1 ‏לְ֭כוּ נְרַנְּנָ֣ה לַיהוָ֑ה נָ֝רִ֗יעָה לְצ֣וּר יִשְׁעֵֽנוּ׃ ‎2 ‏נְקַדְּמָ֣ה פָנָ֣יו בְּתוֹדָ֑ה בִּ֝זְמִר֗וֹת נָרִ֥יעַֽ לֽוֹ׃ ‎3 ‏כִּ֤י אֵ֣ל גָּד֣וֹל יְהוָ֑ה וּמֶ֥לֶךְ גָּ֝ד֗וֹל עַל־כָּל־אֱלֹהִֽים׃ ‎4 ‏אֲשֶׁ֣ר בְּ֭יָדוֹ מֶחְקְרֵי־אָ֑רֶץ וְתוֹעֲפ֖וֹת הָרִ֣ים לֽוֹ׃ ‎5 ‏אֲשֶׁר־ל֣וֹ הַ֭יָּם וְה֣וּא עָשָׂ֑הוּ וְ֝יַבֶּ֗שֶׁת יָדָ֥יו יָצָֽרוּ׃ ‎6 ‏בֹּ֭אוּ נִשְׁתַּחֲוֶ֣ה וְנִכְרָ֑עָה נִ֝בְרְכָ֗ה לִֽפְנֵי־יְהוָ֥ה עֹשֵֽׂנוּ׃ ‎7 ‏כִּ֘י ה֤וּא אֱלֹהֵ֗ינוּ וַאֲנַ֤חְנוּ עַ֣ם מַ֭רְעִיתוֹ וְצֹ֣אן יָד֑וֹ הַ֝יּ֗וֹם אִֽם־בְּקֹל֥וֹ תִשְׁמָֽעוּ׃ ‎8 ‏אַל־תַּקְשׁ֣וּ לְ֭בַבְכֶם כִּמְרִיבָ֑ה כְּי֥וֹם מַ֝סָּ֗ה בַּמִּדְבָּֽר׃ ‎9 ‏אֲשֶׁ֣ר נִ֭סּוּנִי אֲבוֹתֵיכֶ֑ם בְּ֝חָנ֗וּנִי גַּם־רָא֥וּ פָעֳלִֽי׃ ‎10 ‏אַרְבָּ֘עִ֤ים שָׁנָ֨ה׀ אָ֘ק֤וּט בְּד֗וֹר וָאֹמַ֗ר עַ֤ם תֹּעֵ֣י לֵבָ֣ב הֵ֑ם וְ֝הֵ֗ם לֹא־יָדְע֥וּ דְרָכָֽי׃ ‎11 ‏אֲשֶׁר־נִשְׁבַּ֥עְתִּי בְאַפִּ֑י אִם־יְ֝בֹא֗וּן אֶל־מְנוּחָתִֽי׃

1 ləḵû nərannənâ layhwâ nārî‘â ləṣûr yišə‘ēnû: 2 nəqadəmâ fānāyw bəṯwōḏâ bizəmirwōṯ nārî‘a lwō: 3 kî ’ēl gāḏwōl yəhwâ ûmeleḵə gāḏwōl ‘al-kāl-’ĕlōhîm: 4 ’ăšer bəyāḏwō meḥəqərê-’āreṣ wəṯwō‘ăfwōṯ hārîm lwō: 5 ’ăšer-lwō hayyām wəhû’ ‘āśâû wəyabešeṯ yāḏāyw yāṣārû: 6 bō’û nišətaḥăweh wəniḵərā‘â niḇərəḵâ lifənê-yəhwâ ‘ōśēnû: 7 kî hû’ ’ĕlōhênû wa’ănaḥənû ‘am marə‘îṯwō wəṣō’n yāḏwō hayywōm ’im-bəqōlwō ṯišəmā‘û: 8 ’al-taqəšû ləḇaḇəḵem kimərîḇâ kəywōm massâ bammiḏəbār: 9 ’ăšer nissûnî ’ăḇwōṯêḵem bəḥānûnî gam-rā’û fā‘ŏlî: 10 ’arəbā‘îm šānâ| ’āqûṭ bəḏwōr wā’ōmar ‘am tō‘ê lēḇāḇ hēm wəhēm lō’-yāḏə‘û ḏərāḵāy: 11 ’ăšer-nišəba‘ətî ḇə’apî ’im-yəḇō’ûn ’el-mənûḥāṯî: