Psalms (Tehilim): Psalms (Tehilim) Chapter 19

Tanach (Hebrew): Psalms (Tehilim) Chapter 19

‎1 ‏לַמְנַצֵּ֗חַ מִזְמ֥וֹר לְדָוִֽד׃ ‎2 ‏הַשָּׁמַ֗יִם מְֽסַפְּרִ֥ים כְּבֽוֹד־אֵ֑ל וּֽמַעֲשֵׂ֥ה יָ֝דָ֗יו מַגִּ֥יד הָרָקִֽיעַ׃ ‎3 ‏י֣וֹם לְ֭יוֹם יַבִּ֣יעַֽ אֹ֑מֶר וְלַ֥יְלָה לְּ֝לַ֗יְלָה יְחַוֶּה־דָּֽעַת׃ ‎4 ‏אֵֽין־אֹ֭מֶר וְאֵ֣ין דְּבָרִ֑ים בְּ֝לִ֗י נִשְׁמָ֥ע קוֹלָֽם׃ ‎5 ‏בְּכָל־הָאָ֨רֶץ׀ יָ֘צָ֤א קַוָּ֗ם וּבִקְצֵ֣ה תֵ֭בֵל מִלֵּיהֶ֑ם לַ֝שֶּׁ֗מֶשׁ שָֽׂם־אֹ֥הֶל בָּהֶֽם׃ ‎6 ‏וְה֗וּא כְּ֭חָתָן יֹצֵ֣א מֵחֻפָּת֑וֹ יָשִׂ֥ישׂ כְּ֝גִבּ֗וֹר לָר֥וּץ אֹֽרַח׃ ‎7 ‏מִקְצֵ֤ה הַשָּׁמַ֨יִם׀ מֽוֹצָא֗וֹ וּתְקוּפָת֥וֹ עַל־קְצוֹתָ֑ם וְאֵ֥ין נִ֝סְתָּ֗ר מֵֽחַמָּתוֹ׃¹ ‎8 ‏תּ֘וֹרַ֤ת יְהוָ֣ה תְּ֭מִימָה מְשִׁ֣יבַת נָ֑פֶשׁ עֵד֥וּת יְהוָ֥ה נֶ֝אֱמָנָ֗ה מַחְכִּ֥ימַת פֶּֽתִי׃ ‎9 ‏פִּקּ֘וּדֵ֤י יְהוָ֣ה יְ֭שָׁרִים מְשַׂמְּחֵי־לֵ֑ב מִצְוַ֥ת יְהוָ֥ה בָּ֝רָ֗ה מְאִירַ֥ת עֵינָֽיִם׃ ‎10 ‏יִרְאַ֤ת יְהוָ֨ה׀ טְהוֹרָה֮ עוֹמֶ֪דֶת לָ֫עַ֥ד מִֽשְׁפְּטֵי־יְהוָ֥ה אֱמֶ֑ת צָֽדְק֥וּ יַחְדָּֽו׃ ‎11 ‏הַֽנֶּחֱמָדִ֗ים מִ֭זָּהָב וּמִפַּ֣ז רָ֑ב וּמְתוּקִ֥ים מִ֝דְּבַ֗שׁ וְנֹ֣פֶת צוּפִֽים׃ ‎12 ‏גַּֽם־עַ֭בְדְּךָ נִזְהָ֣ר בָּהֶ֑ם בְּ֝שָׁמְרָ֗ם עֵ֣קֶב רָֽב׃ ‎13 ‏שְׁגִיא֥וֹת מִֽי־יָבִ֑ין מִֽנִּסְתָּר֥וֹת נַקֵּֽנִי׃ ‎14 ‏גַּ֤ם מִזֵּדִ֨ים׀ חֲשֹׂ֬ךְ עַבְדֶּ֗ךָ אַֽל־יִמְשְׁלוּ־בִ֣י אָ֣ז אֵיתָ֑ם וְ֝נִקֵּ֗יתִי מִפֶּ֥שַֽׁע רָֽב׃ ‎15 ‏יִֽהְי֥וּ לְרָצ֨וֹן׀ אִמְרֵי־פִ֡י וְהֶגְי֣וֹן לִבִּ֣י לְפָנֶ֑יךָ יְ֝הוָ֗ה צוּרִ֥י וְגֹאֲלִֽי׃

1 lamənaṣṣēḥa mizəmwōr ləḏāwiḏ:

2 haššāmayim məsapərîm kəḇwōḏ-’ēl ûm^a‘ăśēh yāḏāyw magîḏ hārāqî‘a:

3 ywōm ləywōm yabî‘a ’ōmer wəlayəlâ lləlayəlâ yəḥaûeh-dā‘aṯ:

4 ’ên-’ōmer wə’ên dəḇārîm bəlî nišəmā‘ qwōlām:

5 bəḵāl-hā’āreṣ| yāṣā’ qaûām ûḇiqəṣēh ṯēḇēl millêhem laššemeš śām-’ōhel bâem:

6 wəhû’ kəḥāṯān yōṣē’ mēḥupāṯwō yāśîś kəḡibwōr lārûṣ ’ōr^aḥ:

7 miqəṣēh haššāmayim| mwōṣā’wō ûṯəqûfāṯwō ‘al-qəṣwōṯām wə’ên nisətār mēḥammāṯwō:¹

8 twōraṯ yəhwâ təmîmâ məšîḇaṯ nāfeš ‘ēḏûṯ yəhwâ ne’ĕmānâ m^aḥəkîmaṯ peṯî:

9 piqqûḏê yəhwâ yəšārîm məśamməḥê-lēḇ miṣəwaṯ yəhwâ bārâ mə’îraṯ ‘ênāyim:

10 yirə’aṯ yəhwâ| ṭəhwōrâ ‘wōmeḏeṯ lā‘aḏ mišəpəṭê-yəhwâ ’ĕmeṯ ṣāḏəqû y^aḥədāw:

11 hanneḥĕmāḏîm mizzâāḇ ûmipaz rāḇ ûməṯûqîm midəḇaš wənōfeṯ ṣûfîm:

12 gam-‘aḇədəḵā nizəhār bâem bəšāmərām ‘ēqeḇ rāḇ:

13 šəḡî’wōṯ mî-yāḇîn minnisətārwōṯ naqqēnî:

14 gam mizzēḏîm| ḥăśōḵə ‘aḇədeḵā ’al-yiməšəlû-ḇî ’āz ’êṯām wəniqqêṯî mipeš^a‘ rāḇ:

15 yihəyû lərāṣwōn| ’imərê-fî wəheḡəywōn libî ləfāneyḵā yəhwâ ṣûrî wəḡō’ălî: