Psalms (Tehilim): Psalms (Tehilim) Chapter 20

Tanach (Hebrew): Psalms (Tehilim) Chapter 20

‎1 ‏לַמְנַצֵּ֗חַ מִזְמ֥וֹר לְדָוִֽד׃ ‎2 ‏יַֽעַנְךָ֣ יְ֭הוָה בְּי֣וֹם צָרָ֑ה יְ֝שַׂגֶּבְךָ֗ שֵׁ֤ם׀ אֱלֹהֵ֬י יַעֲקֹֽב׃ ‎3 ‏יִשְׁלַֽח־עֶזְרְךָ֥ מִקֹּ֑דֶשׁ וּ֝מִצִּיּ֗וֹן יִסְעָדֶֽךָּ׃ ‎4 ‏יִזְכֹּ֥ר כָּל־מִנְחֹתֶ֑ךָ וְעוֹלָתְךָ֖ יְדַשְּׁנֶ֣ה סֶֽלָה׃ ‎5 ‏יִֽתֶּן־לְךָ֥ כִלְבָבֶ֑ךָ וְֽכָל־עֲצָתְךָ֥ יְמַלֵּֽא׃ ‎6 ‏נְרַנְּנָ֤ה׀ בִּ֘ישׁ֤וּעָתֶ֗ךָ וּבְשֵֽׁם־אֱלֹהֵ֥ינוּ נִדְגֹּ֑ל יְמַלֵּ֥א יְ֝הוָ֗ה כָּל־מִשְׁאֲלוֹתֶֽיךָ׃ ‎7 ‏עַתָּ֤ה יָדַ֗עְתִּי כִּ֤י הוֹשִׁ֥יעַ׀ יְהוָ֗ה מְשִׁ֫יח֥וֹ יַ֭עֲנֵהוּ מִשְּׁמֵ֣י קָדְשׁ֑וֹ בִּ֝גְבֻר֗וֹת יֵ֣שַׁע יְמִינֽוֹ׃ ‎8 ‏אֵ֣לֶּה בָ֭רֶכֶב וְאֵ֣לֶּה בַסּוּסִ֑ים וַאֲנַ֓חְנוּ׀ בְּשֵׁם־יְהוָ֖ה אֱלֹהֵ֣ינוּ נַזְכִּֽיר׃ ‎9 ‏הֵ֭מָּה כָּרְע֣וּ וְנָפָ֑לוּ וַאֲנַ֥חְנוּ קַּ֝֗מְנוּ וַנִּתְעוֹדָֽד׃ ‎10 ‏יְהוָ֥ה הוֹשִׁ֑יעָה הַ֝מֶּ֗לֶךְ יַעֲנֵ֥נוּ בְיוֹם־קָרְאֵֽנוּ׃

1 lamənaṣṣēḥa mizəmwōr ləḏāwiḏ: 2 ya‘anəḵā yəhwâ bəywōm ṣārâ yəśageḇəḵā šēm| ’ĕlōhê ya‘ăqōḇ: 3 yišəlaḥ-‘ezərəḵā miqqōḏeš ûmiṣṣîywōn yisə‘āḏeḵḵā: 4 yizəkōr kāl-minəḥōṯeḵā wə‘wōlāṯəḵā yəḏaššəneh selâ: 5 yiten-ləḵā ḵiləḇāḇeḵā wəḵāl-‘ăṣāṯəḵā yəmallē’: 6 nərannənâ| bîšû‘āṯeḵā ûḇəšēm-’ĕlōhênû niḏəgōl yəmallē’ yəhwâ kāl-mišə’ălwōṯeyḵā: 7 ‘atâ yāḏa‘ətî kî hwōšî‘a| yəhwâ məšîḥwō ya‘ănēhû miššəmê qāḏəšwō biḡəḇurwōṯ yēša‘ yəmînwō: 8 ’ēlleh ḇāreḵeḇ wə’ēlleh ḇassûsîm wa’ănaḥənû| bəšēm-yəhwâ ’ĕlōhênû nazəkîr: 9 hēmmâ kārə‘û wənāfālû wa’ănaḥənû qqamənû wanniṯə‘wōḏāḏ: 10 yəhwâ hwōšî‘â hammeleḵə ya‘ănēnû ḇəywōm-qārə’ēnû: